Бокс: Назаров ва Қурбонов дар даври нимниҳоӣ

Душанбе, 9 апрел. ( АМИТ «Ховар», Аловиддин Бӯриев).- Ду муштзани тоҷик Собирҷон Назаров ва Ҷаҳон Қурбонов дар вазнҳои 75 кг ва 81 кг ба бозихои нимниҳоии интихобии Осиё барои роҳхат ба Бозиҳоии олимпии Лондон, ки дар шаҳри Остона идома дорад, роҳхат гирифтанд. Собирҷон Назаров рақибонаш – Кгиангкай Сукхум (Тайланд) ва Ю-Тинг Янг (Тайван)-ро бо ҳисоби якхелаи 16:11 ба шикаст рӯ ба рӯ карда, новобаста аз натиҷаи бозихои минбаъда соҳиби роҳхат ба бозиҳои олимпӣ гардид. Дар рақобати навбатӣ боксчии мо бо чемпиони дукаратаи ҷаҳон Аббос Атоев аз Ӯзбекистон қувва месанҷад. Дар навбати худ Ҷаҳон Қурбонов муштзани муғул Ерденебаяр Сандаксуренро бо натиҷаи 19 бар 16 шикаст дод. Дар вазни 91 кг Диловаршо Абдураҳмонов аз боксчии қазоқ Василий Левит бо натиҷаи 18 бар 2 мағлуб гашт.Се муштзани дигари мо — Асрор Воҳидов (49 кг), Назири Пиракӣ (64 кг) ва Меҳроҷиддин Каримов (+91 кг) бо рақибони худ қувваозмоӣ мекунанд.