Дар ҳошияи футбол

Душанбе, 13 апрел. ( АМИТ «Ховар», Аловиддин Бӯриев).- Собиқ бозингари дастаи мунтахаби Тоҷикистон Виталий Левченко ба вазифаи сармураббии дастаи “Еднист”-и лигаи дуввуми Украина таъин шуд. Виталий дар 19-солагӣ ба ҳайати дуввуми дастаи “Динамо” Киев шомил шуда, сипас дар дастаҳои ССКА ва “Таврия” бозӣ кардааст. Баъди анҷоми ҳунарнамоӣ ҳамчун мураббӣ дар академияи футболи “Арсенал”-и Украина фаъолият доштааст.Николя Анелка, ки дар дастаи «Шанхай Шенхуа» хунарнамоӣ дорад, вазифаи нав гирифт ва минбаъд ба ҳайси мураббии бозингар фаъолият мекунад. Роҳбарони клуб маоши 230 000 евро дар як ҳафтаро барои ӯ зиёд дониста, кори иловагӣ зам карданд. Ба ин васила ёварони сармураббӣ Жан Тигана аз вазифа сабукдӯш шуданд. Дастаи «Шанхай Шенхуа» дар панҷ давр ҳамагӣ 7 имтиёз ба даст оварда, дар зинаи панҷум қарор дорад.