Дар ду моҳ чӣ қадар маҳсулоти саноатӣ истеҳсол шуд?
Душанбе, 4 апрел. (АМИТ «Ховар», Лаззат Диловарзод).- Бино ба маълумоти Агентии омори назди Президенти ҶТ, ҳаҷми истеҳсоли маҳсулоти саноатӣ дар ду моҳи аввали соли 2012 ба 1 млрд. 354,9 млн.сомонӣ расид. Дар Агентии омор ҳаҷм ва номгӯи истеҳсолоти саноатиро шарҳ дода, иброз доштанд, ки корхонаҳои саноатӣ дар моҳҳои январ – феврали соли ҷорӣ ҳамагӣ ба маблағи 1 млрд. 354 млн. 900 ҳазор сомонӣ маҳсулот истеҳсол намудаанд. Дар ин давра истихроҷи маъдан ба 109 млн. 546 ҳазор сомонӣ, истихроҷи маводи энергетикӣ ба 9 млн. 135 ҳазор сомонӣ, истихроҷи маводи ғайриэнергетикӣ ба 911 млн. 235 ҳазор сомонӣ, истеҳсоли маводи хӯрокворӣ дар якҷоягӣ бо нӯшокиҳо ва тамоку ба 362 млн. 954 ҳазор сомонӣ расид.