Кӯмак ба зарардидагон
Душанбе, 4 апрел. (АМИТ «Ховар», Лаззат Диловарзод).- Бино ба гуфти раиси ҷамъияти Ҳилоли Аҳмари вилояти Хатлон Зубайдулло Толибов, ба зарардидагони маҳаллаи «Баҳор»-и шаҳри Қӯрғонтеппа кӯмакҳои аввалия расонида шуданд.Ёдовар мешавем, ки шаби 1-уми апрели соли 2012 бар асари борони сел манзили зисти беш аз 60 сокини маҳаллаи «Баҳор»-и шаҳри Қӯрғонтеппа комилан хароб гардид. Дар маҳалли фалокати табиӣ ситоди шаҳрии рафъи оқибати ҳодисаи табиӣ ташкил ёфта, дар якҷоягӣ бо афсарони Кумитаи ҳолатҳои фавқулодда ва мудофиаи граждании вилояти Хатлон ба сокинони маҳаллаи зарардида кӯмак мерасонанд. Ситоди таъсисшудаи ҳукумати шаҳр зарари хисороти табииро дар ҷойи ҳодиса муайян мекунад. Сокинони маҳаллаи «Баҳор» сабаби рух додани ҳодиса ва зарари расидаро дар тоза накардани заҳбуру ҷӯйборҳои обпарто аз ҷониби кормандони марбутаи шаҳр медонанд. Селоба баробари ба коми худ кашидани хонаҳои истиқоматӣ, захираи хӯроквории мардумро низ ба пуррагӣ нобуд сохт. Ба зарардидагон маводи хӯрокӣ, ҷойи хоб, аз қабили матрас, болишт, хайма ва дегу табақ тақсим карда шуд. Ҳукумати шаҳр иқдоми дигарро низ пайгирӣ мекунад.