Лаҳзаҳои хотирмон

Хоруғ, 23 апрел. (АМИТ «Ховар», Л.Додо ). – 33 нафар сарбозону сержантҳо, ки қарзи Ватан — Модарро адо кардаанд, аз шаҳру ноҳияҳои кишвар ба вилоят баргаштанд. Ба ин муносибат дар қисми низомии 0123 қувваҳои зудамали Вазорати дифои Ҷумҳурии Тоҷикистон мустақар дар шаҳри Хоруғ маросими бошукӯҳе баргузор гардид.Бо ворид намудани Парчами қисми низомӣ ва танинандоз шудани Суруди миллӣ тантана оғоз ёфта, муовини комиссари ҳарбии вилоят Беҳзод Саидиброҳимов сарбозонеро, ки хидмати низомиро анҷом додаанд, шодбош гуфт. Чорабинии имсола ба ифтихори адои хидмати ҳарбӣ дар қисми низомӣ ба тарзи нав ва рӯҳияи тарбияи ватанпарастӣ дар қалби кӯдакону наврасон ҷараён гирифт. Сарбозонро тарбиягирандагони боғчаи бачагонаи рақами якуми шаҳри Хоруғ ва толибилмони мактаби таҳсилоти ҳамагонии ба номи Давлаталӣ Шабдолови шаҳр бо қироати шеърҳо дар васфи Ватан – Модар табрик намуданд.Мутобиқи нақшаи чорабинӣ ба 33 нафар сарбозоне, ки мӯҳлати хидмати ҳарбиро баҷо овардаанд, билетҳои ҳарбӣ супорида шуда ва беҳтаринҳо бо ифтихорномаҳо қадр гардиданд.