Марко Полоро кӣ парронд?
Душанбе, 10 апрел. (АМИТ «Ховар», Лаззат Диловарзод).- Бино ба гуфти намояндаи Кумитаи ҳифзи муҳити зист дар ВМКБ Р. Шарипов, дар айни замон шумораи гӯсфандони зоти Марко Поло дар ин минтақаи ҷумҳурӣ 24 ҳазор сарро ташкил медиҳад. Ҳамасола барои шикори ин ҳайвони нодир танҳо 10 фоиз ё худ беш аз 200 сар иҷозат дода мешавад. Қимати як иҷозатнома-и шикори Марко Поло аз 10 то 12 ҳазор доллари амрикоӣ буда, паррондан ва ба даст овардани ин ғанимат 24 ҳазор долларро ташкил медиҳад.Қӯруқшиканӣ аз мушкилоти асосии соҳа аст. Қӯруқшиканон асосан шаҳрвандони хориҷианд, ки бо роҳҳои назоратнашаванда дар Бадахшон вориди шикоргоҳ гардида ин ҳайвони нодир ва пурарзишро шикор мекунанд. То гузаронидани ислоҳоти сохтор 4 шӯъба ва дар мавсим то 200 нафар коргар фаъолият мекарданд. Дар айни замон ҳамагӣ як шӯъба ва 4 мутахассис кор мекунад, ки наметавонанд тамоми вазъиятро зери назорати худ нигоҳ доранд.Баъзан кормандони ҳифзи ҳуқуқ ба қонуншиканӣ роҳ дода, гӯсфанди Зоти Марко Полоро шикор мекунанд. Соли 2011 нисбат ба 5 нафар корманди ҳифзи ҳуқуқ барои қӯруқшиканӣ дар шикори Марко Поло парвандаи ҷиноӣ оғоз гардида, бо қарори суд 700 ҳазор сомонӣ ҷарима баста шуданд.