Намоишгоҳҳои таълимии «Аҳмадсоз»

Душанбе, 20 апрел. (АМИТ «Ховар», Музаффари Рустам).- Имрӯз ширкати муштараки Тоҷикистону Малайзия «Аҳмадсоз» VI-умин намоишгоҳи байналмилалии таълимиро бо дастгирии Ҳукумати Ҷумҳурии Тоҷикистон, Вазорати маорифи Малайзия ва Палатаи савдою саноати ҶТ баргузор намуд. Дар намоишгоҳ сафири Малайзия, намояндагони Вазорати маорифи ҷумҳурӣ, намояндаи дастгоҳи ичроияи Президенти ҶТ ва роҳбарони Донишгоҳҳои Британияи Кабир, Туркия, Ҷумҳурии Мардумии Чин, Иттиҳоди давлатҳои араб иштирок доштанд. Хотиррасон менамоем, ки Ширкати муштараки Тоҷикистону Малайзия соли 2008 таъсис ёфта, ҳадафи асосии ташкили ширкат пеш аз ҳама тайёр намудани мутахассисони баландихтисос дар равияҳои илмҳои дақиқ, технологияи иттилоотӣ, соҳаи муҳандисӣ, соҳаи архитектура мебошад. Азбаски ҷумҳурии Тоҷикистон ба мутахассисон ниёз дорад, роҳбарияти ширкат тасмим гирифтааст, ки барои омода намудани чунин мутахассисони баландихтисос бо пешрафтатарин донишгоҳҳои кишварҳои хориҷӣ қарордод бандад. Ширкати «Аҳмадсоз» чанд сол аст, ки бо донишгоҳҳои ин кишвар шартнома дорад ва 400 нафар донишҷӯйро ба донишгоҳҳои гуногуни Малайзия, Ҷумҳурии Туркия, Чин ва дигар кишварҳо сафарбар намудааст. Бештари донишҷӯён дар барномаҳои бакалавр дохил шуда, қисми дигари онҳо дар соҳаи илмҳои дақиқ таҳсил мекунанд. Ширкати «Аҳмадсоз» 6-умин намоишгоҳи таълимиро дар ҳамдастӣ бо Вазорати маорифи ҷумҳурии Тоҷикистон, Вазорати маорифи Малайзия ва Палатаи савдою саноати ҶТ рӯзҳои 20-ум ва 21-уми апрел дар шаҳри Душанбе, 23-юми апрел дар шаҳри Турсунзода ва 25-уми апрел дар шаҳри Хуҷанд доир менамояд.