Ниҳолхона дар Конибодом
Суғд, 27 апрел. (АМИТ «Ховар», М.Амонов). – Яке аз роҳҳои зиёд кардани ниҳолҳои сабзу ороишӣ кишту парвариши тухмӣ ва қаламчаи онҳо дар ниҳолхонаҳост. Дар Ҷамъияти саҳҳомии ба номи Энаҷон Бойматоваи ноҳияи Конибодом дар майдони 2 гектар чунин ниҳолхонаи нав ташкил карда шуд.Дар он алҳол 18 ҳазор бех – 7 намуди зардолу, 20 ҳазор дона қаламчаи ангур, 20 ҳазор дона қаламчаи сафедор ва дар қатори алоҳида ниҳоли хурмо шинонида шудааст, ки моҳи ноябр тайёр мешаванд. Ташкили ниҳолхона барои бунёди 200 гектар боғи нав ва барқарор намудани 100 гектар боғи кӯҳна дар хоҷагӣ мусоидат менамояд.