Рӯзи имтиҳон 29 –уми апрел
Душанбе, 20 апрел.(АМИТ «Ховар», Лаззат Диловарзод).- Хатмкунандагони синфи 6 тавассути имтиҳон ба литсей-интернатҳои муштараки тоҷикию туркӣ қабул карда мешаванд. Таҳсил дар литсей-интернатҳо бо ду забон- тоҷикию туркӣ ва омӯзиши забони англисӣ бо истифода аз компютер, видео, аудио, ТВ сурат мегирад. Дар литсей-интернатҳо фанҳои дақиқ- химия, физика, биология, математика, технологияи информатсионӣ, фанҳои гуманитарӣ — таърих, ҷуғрофия, забон ва адабиёти тоҷик, асосҳои давлат ва ҳуқуқ бо методи нави таълим омӯзонида мешаванд.Ба иттилои роҳбарони литсей-интернатҳо, писарону духтарон дар асоси аризаи волидайнашон бо хобгоҳ ва дар як рӯз се маротиба бо хӯроки гарм таъмин мешаванд. Дар вақтҳои холӣ байни хонандагон маҳфил, озмун ва мусобиқаҳои варзишӣ гузаронида мешавад.Даври якуми имтиҳон дар ҳамаи шаш литсей-интернати ҷумҳурӣ рӯзи 29-уми апрел соати 9 эълон гардидааст. Онҳое, ки дар даври якуми имтиҳони қабул ширкат карда натавонистанд ё баҳои ғайри қаноатбахш гирифтаанд, ба даври дуюми имтиҳон роҳ дода намешаванд.