«Раҳбари наҷот»-и Фитрат

Душанбе, 10 апрел. (АМИТ «Ховар», Ҳотам Рабиев).-Нашриёти «Шуҷоиён» китоби Ҳоҷӣ Абдурауфи Фитрати Бухороиро бо номи «Раҳбари наҷот» бо теъдоди 500 нусха нашр намуд.Китоб бо кӯшиши устоди Донишгоҳи миллии Тоҷикистон, донишманди асил Абдулҳай Маҳмадаминов барои табъу нашр омода гардидааст. Устод А.Маҳмадаминов бо сарсухани пурмӯҳтаво, таҳия, танзим, тавзеҳ, шарҳи луғат ва баёни феҳрастҳо китобро хонданибоб намудааст. «Роҳбари наҷот»- китоби пурҳикмати ахлоқиест, ки ба садҳо суоли зиндагии ҳаррӯза ҷавоби саҳеҳу рӯшан дода, мушкилоти ҳаёти мардумро осон мегардонад.Мутолиаи ин китоби пурбаҳо касро ба кӯи мурод мерасонад, накӯкору шарафманд месозад, ӯро саодатманд мегардонад, дар вай ҳисси амиқи худшиносиву худогоҳӣ, халқпарварию ватандӯстӣ ва ифтихори миллиро мепарварад. Китоб аз он ҷиҳат арзиши баланд дорад, ки аз ибтидо то интиҳо бо пурарзиштарин ганҷинаи ҷаҳонӣ ва зару зевари инсонӣ — оёти Қуръонӣ ва аҳодиси набавӣ ороста ва пероста шудааст.Китоби тозанашри «Раҳбари наҷот» матни илмии интиқодӣ буда, чун дастури таълимӣ низ хизмат хоҳад кард.