Семинарҳои машваратии омори гендерӣ дар Хуҷанду Исфара

Душанбе, 5 апрел. (АМИТ «Ховар», Покиза Маҳмадбекова). — Дар доираи лоиҳаи «Гендер ва идораи демократӣ барои рушд – пешниҳоди хизматҳои асосӣ барои занон» дар охири моҳи марти соли равон мутахассисони Агентии омори назди Президенти ҶТ доир ба омори гендерӣ дар шаҳрҳои Хуҷанд ва Исфараи вилояти Суғд семинарҳои машваратӣ гузарониданд. Аз Кумитаи омори ҷумҳурӣ ба мухбири АМИТ «Ховар» иттилоъ доданд, ки мақсад аз гузаронидани семинар ин шинос намудани иштирокчиён бо принсипҳои асосии омори гендерӣ, пешниҳоди натиҷаҳои арзёбии ҳолати омори гендерӣ дар ҳифзи иҷтимоӣ ва ба инобат гирифтани ақидаҳо ва шарҳу эзоҳи шарикон, баррасии тавсияҳо доир ба таҳияи нақшаҳои кории омӯзиш ва чорчӯбаҳои меъёрӣ доир ба омори гендерӣ иборат буд. Дар семинарҳо дар маҷмӯъ зиёда аз 40 нафар мутахассиси сохторҳои гуногуни Вазорати меҳнат ва ҳифзи иҷтимоии аҳолӣ дар шаҳрҳои Хуҷанд, Исфара ва ноҳияи Ғончӣ аз қабили Агентии ҳифзи иҷтимоӣ ва муҳоҷират, Агентии суғуртаи иҷимоӣ ва нафақа, шӯъбаи кӯмаки иҷтимоӣ дар хона, инчунин Агентии омор дар вилояти Суғд иштирок намуданд. Вазъи ҷории омори гендерӣ, дар бораи натиҷаҳои арзёбии масъалаҳои оморие, ки ба дастрасӣ ба ҳифзи иҷтимоӣ, хусусан занон ва кӯдакон алоқаманд ҳастанд, пешниҳод карда шуд. Аз рӯи иттилоъи манбаъ, иштирокчиён бо хазинаи маълумоти Агентии омор, ҳамчунин хазинаи маълумоти омории шаҳри Исфара ҳангоми ворид намудани маълумоти тозаи соли 2011 шинос гардиданд. Бо мисолҳои мушаххаси хазинаи маълумотҳои мавҷудбуда пешниҳод карда шуд, ки нишондиҳандаҳо гендерӣ-ҳиссиётӣ илова карда шаванд. Аз ҷумла, шумораи занҳое, ки нафақа ва кӯмакпулӣ мегиранд ва андозаи миёнаи нафақа нисбат ба андозаи нафақаи мардҳо, кӯмакпулӣ барои ҳар як кӯдаки минбаъд таваллудшуда, шумораи занҳои гирандаҳои кӯмакпулӣ барои ҳомиладорӣ ва таваллуд муайян карда шуд.