Соҳибкорони содиркунанда дастгирӣ мешаванд

Душанбе, 26 апрел. (АМИТ «Ховар», Бекназари Абӯбакр). – 26 апрел раиси вилояти Суғд Қоҳир Расулзода роҳбари Барномаи рушди Созмони Милали Муттаҳид дар Тоҷикистон Норимаса Шимомураро ба ҳузур пазируфт. Зимни мулоқот Шимомура аз рафти иҷрои лоиҳаҳои барномаи рушди Созмони Милали Муттаҳид дар вилояти Суғд ҷиҳати татбиқи амалии «Барномаи рушди иқтисодии деҳот» ва маблағгузории лоиҳаҳои «Фонди боварӣ» ба раиси вилояти Суғд маълумот дод.Аз хадамоти матбуоти раиси вилояти Суғд ба АМИТ «Ховар» иттилоъ доданд, ки раиси вилоят аз ҳамкориҳои судманд бо шарикони Барномаи рушди Созмони Милали Муттаҳид дар Тоҷикистон изҳори сипос намуд, ки дар бобати вусъат бахшидани тараққиёти соҳаҳои мухталифи иқтисодиёт ва иҷтимоиёти вилоят мусоидат менамоянд.Қ. Расулзода қайд намуд, ки барои ривоҷи соҳибкории хурду миёна, афзун намудани содироти молу маҳсулот, таъсиси ҷойҳои нави корӣ, ҳалли масъалаҳои иҷтимоии мардум, ки дар натиҷаи рӯзи қабули шаҳрвандон ба миён меоянд, ба инобат гирифтани ин масъалаҳо дар таҳияи лоиҳаҳои минбаъдаи ин ташкилоти бонуфуз мувофиқи мақсад аст.Норимаса Шимомура дар робита ба ин изҳор дошт, ки худи дирӯз аз тарафи Ҳукумати Финляндия як лоиҳаи нав, ки махсус барои вусъат бахшидани тиҷорат, хосса барои дастгирии соҳибкороне, ки бо содирот ва истеҳсоли маҳсулот дар вилоят машғуланд, тасдиқ карда шуд ва он мавриди иҷро қарор мегирад.