Ҷаласаи Шӯрои байниҳукуматии чор кишвар дар АМА

Душанбе, 18 май. (АМИТ «Ховар», Дилшодаи Хайруллоҳ).-17 майи соли равон таҳти раисии Ҷумҳурии Тоҷикистон дар шаҳри Дубайи АМА ҷаласаи байниҳукуматии чор кишвари иштирокчии лоиҳаи «CASA-1000»- Ҷумҳуриҳои Тоҷикистон, Қирғизистон, Ҷумҳурии Исломии Афғонистон ва Ҷумҳурии Исломии Покистон идома дорад. Тавре ки ба АМИТ «Ховар» аз котиботи Вазорати энергетика ва саноати Ҷумҳурии Тоҷикистон иттилоъ доданд, дар рафти ҷаласаҳо масъалаҳои вобаста ба таркиб ва маблағгузории лоиҳа баррасӣ мешаванд. Дар айни замон лоиҳа аз ҷониби Бонки умумиҷаҳонӣ, Бонки исломии рушд ва Агентии ИМА доир ба рушди байналмилалӣ (USAID) дастгирӣ карда мешавад. Ҳамзамон бояд тазаккур дод, ки сохторҳои молиявӣ ва сармоягузорони дигар метавонанд дар татбиқи лоиҳа иштирок намоянд. Дар ин робита бо ташаббуси ҷониби Тоҷикистон ба ҷаласа як қатор сохторҳои молиявии байналмилалӣ ва кишварҳои араб, аз ҷумла Фонди ОПЕК доир ба рушди байналмилалӣ (OFID), Фонди саудии рушд, Фонди рушди Абу Дабӣ ва Фонди кувайтии арабии рушди иқтисодӣ бо мақсади мусоидат ба лоиҳаи «CASA-1000» даъват шудаанд. Ёдовар мешавем, ки чор кишвари Осиёи Марказӣ ва ҷанубӣ (Ҷумҳурии Тоҷикистон, Ҷумҳурии Қирғизистон , Ҷумҳурии Исломии Афғонистон, Ҷумҳурии Исломии Покистон) имконияти якҷояи худро баҳри пайвастани хатҳои барқи миллии кишварҳои худ таҳти лоиҳаи муштарак «CASA-1000» равона намудаанд. Татбиқи лоиҳаи мазкур барои содир намудани барқи иловагии тавлидшавандаи Тоҷикистон ва Қирғизистон ба бозори Покистон ва Афғонистон, ки ин кишварҳо аз нерӯи барқ танқисӣ мекашанд, имкон медиҳад. Ҳамчунин бояд тазаккур дод, ки дар татбиқи лоиҳа истифодаи технология ва таҷҳизоти муосир дар назар дошта шудааст. Дар ҷаласа протоколҳои ҷаласаҳои гурӯҳҳои корӣ ва Шӯрои байниҳукуматӣ ба имзо расиданд.Ёдовар мешавем, ки ҷониби Ҷумҳурии Тоҷикистонро вазири энергетика ва саноати ҶТ Гул Шералӣ, Ҷумҳурии Қирғизистонро муовини вазири корҳои хориҷӣ Нурлан Айтмурзоев, Ҷумҳурии Исломии Афғонистонро вазири энергетика ва захираҳои об Муҳаммад Исмоилхон, Ҷумҳурии Исломии Покистонро вазири энергетика ва захираҳои об Саид Навид Қамар роҳбарӣ мекунанд.