Ҷашнгоҳи Рўзи ҷаҳонии муҳити зист куҷост?

Душанбе, 28 май.(АМИТ «Ховар», Марзия Саидова).- 5 июн дар саросари ҷаҳон Рўзи байналмилалии муҳити зист таҷлил мегардад.  Бобати дар сатҳи баланд истиқбол гирифтани ин сана шаҳрдори Душанбе қарор ба тасвиб расонд, ки дар асоси он 5 июн дар Боғи фарҳангию фароғатии «Дўстии халқҳо»-и Душанбе Рўзи байналмилалии муҳити зист таҷлил мешавад. Шаҳрдорӣ ҳамзамон дар доираи татбиқи барномаҳои экологӣ дар пойтахт, баргузории як қатор чорабиниҳоро тарҳрезӣ намудааст. Доир намудани амалиёти «Тозагии соҳил» дар каналу селпартоҳо ва ҳавзаҳои дар ҳудуди пойтахт буда ва амалиёти «Тозагии маҳал» дар шаҳраку маҳаллаҳои ноҳияҳои шаҳр далели ин гуфтаҳост. Инчунин дар ин давра дар маҳаллаҳо корҳои фаҳмондадиҳӣ гузаронида шуда, маърифати экологии сокинон такмил дода мешавад. Ташкили сўҳбату мизи мудаввар дар мавзўи маърифати экологӣ ва фарҳанги шаҳрнишинӣ, ба намоиш гузоштани «Гӯшаҳои табиат», расмҳо дар мавзӯъҳои экологӣ, маҳсулоти тозаи экологӣ бо иштироки фаъолони гурӯҳи «Патрули сабз» номгўи дигари чорабиниҳои шаҳрдорӣ дар робита ба таҷлили Рўзи ҷаҳонии муҳити зист аст.