Беҳ шудани шароити нави корӣ
Душанбе, 8 май. (АМИТ «Ховар», Лаззат Диловарзод).- Дар шаҳри Турсунзода бинои нави суд пас аз сохтмони иловагӣ мавриди баҳрабардорӣ қарор дода шуд. Дар мавриди ба истифодадиҳии он раиси Шӯрои адлияи Ҷумҳурии Тоҷикистон Зафар Азизов ва раиси шаҳри Турсунзода Давлатшо Гулаҳмадов иштирок ва суханронӣ намуданд. Раиси Шӯрои адлия З. Азизов аз он бо ифтихор ёдоварӣ намуд, ки бо шарофати Истиқлолияти давлатӣ ва қабули аввалин конститутсия, ҳокимияти судӣ як рукни алоҳидаи ҳокимияти давлатӣ эътироф гардид. Ҳукумати ҷумҳурӣ дар бобати тақвияти фаъолияти ҳокимияти судӣ, ки вазифаи он ба татбиқи муқаррароти конститутсия дар ҳифзи ҳуқуқ, озодии инсону шаҳрванд, манфиати давлат, ташкилоту муассисаҳо ва қонунияту адолат нигаронида шудааст, тадбирҳои назаррас меандешад.Дар асоси Барномаи ислоҳоти судӣ ва раванди татбиқи он сохтмони бинои иловагии суди шаҳри Турсунзода, ки ҳанӯз соли 1991 оғоз ёфта буд, мавриди баҳрабардорӣ қарор ёфт, ки баҳри беҳтар шудани шароити кори судяҳо хуб мусоидат менамояд.Ба гуфти З. Азизов, барои сохтмони бинои иловагӣ ва таъмири дигар иншооти суди шаҳри Турсунзода, аз ҷумла толори суд ва утоқҳои корӣ аз ҷониби мақомоти иҷроияи ҳокимияти давлатӣ ва Шурои адлияи ҶТ беш аз 258 ҳазор сомонӣ маблағ масраф гардидааст.