Ифтитоҳи беморхонаи «Нури Вахш»
Душанбе, 16 май. (АМИТ «Ховар», Дилшодаи Хайруллоҳ).- 15 майи соли равон котиби саввуми Сафорати Ҷопон Такааки Коматсу ва раиси ноҳияи Ҷиликӯл Маҳмадраҳим Исмоилов дар маросими ифтитоҳи беморхонаи минтақави № 2 ҷамоати “Нури Вахш”-и ноҳияи Ҷиликул ширкат варзиданд. Лоиҳаи барқарорсозии беморхонаи минтақавии №2 ҷамоати «Нури Вахш»-и ноҳияи Ҷиликӯл ба маблағи умумии 105,992 доллари ИМА аз тарафи Ҳукумати Ҷопон дар чаҳорчӯбаи кӯмакҳои бебозгашти лоиҳаҳои амнияти башарӣ дастгирӣ ёфт.Аз соли 1991 дар бемористон корҳои барқарорсозӣ анҷом дода нашудаанд ва муҳити зист дар ҳолати ғайрисанитарӣ буд. Зиёда аз ин норасоии таҷҳизоти тиббӣ боиси паст шудани сифат ва норасоии хизматрасонии тиббӣ ба аҳолии ҷамоати “Нури Вахш”-и ноҳияи Ҷиликӯл оварда расонд.Барои беҳбудии муҳит ва сифати хизматрасонии тиббӣ дар чаҳорчӯбаи лоиҳа сохтмони бинои нав ва барқарорсозии бинои мавҷуда иҷро шуд. Илова бар ин, таҷҳизоти нави тиббӣ, мисли дастгоҳи ултра садо, мизи ҷарроҳӣ ва электрокардиограф насб шуд.Дар натиҷаи татбиқи лоиҳаҳои соҳаи тандурустӣ дар назар аст, ки беморхонаҳо барои беҳтар намудани шароити тиббии мардуми маҳаллии ноҳияҳои Панҷ ва Ҷиликӯли вилояти Хатлон мусоидат намоянд.Кӯмакҳои бебозгашти лоиҳаҳои амнияти башарӣ барои бахши аъзами аҳолӣ ба ҳокимиятҳои маҳаллӣ, соҳаҳои маорифу тандурустӣ ва ташкилотҳои байналмилалии ғайридавлатии мамлакатҳои рӯ ба тараққӣ расонида мешавад. Лоиҳаҳои амнияти башарӣ барои бахши аъзами аҳолӣ кӯмак мерасонанд. Кӯмакҳои бебозгашти лоиҳаҳои амнияти башарӣ зиёда аз 282 лоиҳаро ба маблағи умумии $21.1 миллион доллари ИМА дар Тоҷикистон роҳандозӣ намудааст.