Ислоҳоти системаҳои таъминоти об
Душанбе, 23 май. (АМИТ «Ховар», Кристина Эрлих). – 22 май дар ноҳияи Рӯдакӣ тренинги якум оид ба ислоҳоти системаҳои таъмини оби нӯшокӣ ва расмиятҳои нави вобаста ба додани иҷозати бунёди системаҳои таъмини оби нӯшокӣ мутобиқи Қарори Ҳукумати ҶТ аз 6 майи соли 2009 корашро анҷом дод. Дар ин бора аз намояндагии Оксфам дар Тоҷикистон ба АМИТ «Ховар» хабар доданд.Дар кори тренинг намояндагони ҳамаи вазорату идораҳои манфиатдори кишвар, ҳукуматҳои ноҳияҳои Рӯдакӣ ва Мӯъминобод, ҳамчунин ҳамкорони хориҷӣ, ки лоиҳаҳои оид ба эҳёӣ системаҳои таъминоти об дар Тоҷикистонро дастгирӣ менамоянд, иштирок доштанд. Тренинг дар доираи татбиқи механизми «Равзанаи ягона» барои гирифтани иҷозати сохтмони системаҳои таъмини оби нӯшокӣ баргузор гардид. Ду тренинги дигар оид ба коммуникатсияи дохилию хориҷӣ, тарҳрезӣ ва истифодаи вақт, беҳдошти ҳамоҳангсозии фаъолият дар доираи механизми «Равзанаи ягона» рӯзҳои наздиктарин доир мегарданд.