Китоб- сарчашмаи дониш

Душанбе, 18 май. (АМИТ «Ховар», Ҳотам Рабиев).- Бо ташаббуси Вазорати фарҳанг рӯзҳои 24-26 май дар шаҳри Душанбе Намоишгоҳи дуюми байналмилалии китоб баргузор мегардад. Дар ин ҳамоиши бузург маҳсули эҷоди шоирону нависандагон, ки дар нашриёти гуногун рӯи чопро дидаанд, пешкаши тамошобинон хоҳад гашт. Тибқи нақша рӯзҳои баргузории намоиши китоб вохӯрии хонандагон бо 10 нафар шоиру нависандаи маъруф, муаррифии 10 китоби тозанашри беҳтарини интишороти ватанӣ, конфронси илмӣ дар мавзӯи «Китоб ва нақши он дар робитаҳои фарҳангии кишварҳои ҷаҳон», семинар бо ширкати 16 нафар ношири ватаниву хориҷӣ доир хоҳад шуд. Ҳамчунин тавре ки масъули баргузории ин чорабинӣ директори Муассисаи нашриявии «Адабиёти бачагона» Наҷмиддин Зайниддинов иттилоъ дод, баъди намоиши китоб консерт-марафон бо ширкати овозхонони машҳури ҷумҳурӣ баргузор мегардад.