Кормандони сохторҳои қудратӣ қоидаҳои роҳро вайрон мекунанд?
Душанбе, 17 май. (АМИТ «Ховар», Мавҷуда Анварӣ).- Бо мақсади таъмини волоияти қонун, ба танзим даровардани баъзе омилҳои чашмраси вайронкунии қодаҳои роҳ бо супориши вазири корҳои дохилӣ генерал-лейтенанти милитсия Рамазон Раҳимов кормандони Раёсати амнияти дохилӣ дар якҷоягӣ бо кормандони Раёсати бозрасии давлатии автомобилӣ ва маркази матбуоти Вазорати корҳои дохилӣ дар ҳудуди шаҳри Душанбе воситаҳои нақлиётро мавриди санҷиш қарор доданд. Тавре ки дар сомонаи интернетии mvd.tj иттилоъ дода шудааст, ҳастанд нафароне, ки дар сохторҳои қудратии мамлакат ифои вазифа карда, аз вазифаҳои худ сӯйистифода мекунанд. Аз ҷумла, амалҳои ғайриқонунии чунин кормандон ҳангоми идораи нақлиёт баръало ба назар мерасад. Рафти рейди мазкур 25 ҳолати вайронкунии қоидаро аз ҷониби кормандони сохторҳои қудратӣ ошкор кард. Иштирокчиёни вайронкунии қоидаҳои роҳ 1-нафар корманди ВКД, 2-нафар корманди мақомоти Прокуратура, 1-нафар корманди Агентии назорати давлатии молия ва коррупсия, 1-нафар корманди Хадамоти гумрук мебошанд, ки аз ҷониби онҳо вайронкунии қоидаҳои роҳ баръало ба чашм мерасиду онҳо ба ҷои ислоҳ кардани камбудиҳои худ, баръакс бо кормандони ҳифзи ҳуқуқ баҳсу муноқиша мекарданд. Воситаҳои нақлиёти чунин вайронкунандаҳои қоидаи роҳ ба ҷаримагоҳ бурда ва нисбат ба онҳо тадбирҳои қонунӣ андешида мешавад.