Маркази иттилоотии тиббӣ кушода мешавад

Хоруғ, 22 май. (АМИТ «Ховар», Л.Додо ). – Раёсати тандурустии ВМКБ тасмим гирифтааст, ки дар ҳамкорӣ бо Хадамоти тансиҳатии Бунёди Оғохон дар ояндаи наздик Маркази иттилоотиро таъсис дода ва ба ин васила барои ташкили тибби фосилавӣ замина гузорад. Коршиносони ҳар ду ҷониб дар шаҳри Хоруғ семинар – машварати дурӯза баргузор намуда, барои ҳар чи зудтар иҷро намудани ин барнома фикру мулоҳизаҳои худро баён намуданд.Дар семинар қайд гардид, ки дар ҷаҳони имрӯза ҳеҷ кору амалеро, хусусан дар соҳаи тиб, бидуни технологияи коммуникатсионӣ пурра анҷом додан имконнопазир аст. Директори сариҷроияи Хадамоти тансиҳатии Бунёди Оғохон дар Осиёи Марказӣ Фотимаи Маҳмадалӣ изҳор дошт, ки чунин усули кор дар мамолики пешрафта солҳо боз вуҷуд дорад ва мехоҳем, ки донишу таҷрибаи андӯхтаамонро ба ҳамкасбонамон аз Бадахшони Тоҷикистон низ ёд диҳем.Баъди дар маркази вилоят ташкил ёфтани муассисаи зикршуда табибони Бадахшон барои ҳалли масъалаҳои зарурӣ метавонанд аз ҳамкасбони хориҷии худ дар зудтарин фурсат маслиҳат ва кӯмак гиранд.