Насби технологияи муосир дар корхонаҳои ватанӣ

Душанбе, 16 май. (АМИТ «Ховар», Дилшодаи Хайруллоҳ).- Бо ҷалби сармояи дохилӣ ва хориҷӣ ҳамасола дар шаҳру ноҳияҳои ҷумҳурӣ корхонаҳои нави саноати хӯрокворӣ бо хатҳои технологии муосир бунёд мегарданд. Танҳо дар соли гузашта бо ҷалби сармояи дохилӣ дар ҷумҳурӣ 10 корхонаи коркарди гӯшту шир (Сехҳои истеҳсолии «Тешазод» ва «Азиза» дар Душанбе, «Додобоев», «Маҳмудов», «Усмонов», «Раҳмонов», «Азизӣ» ва «Саидов» дар вилояти Суғд, ҶММ «Салимхон» ва «Сафаров Холназар» дар шаҳри Қӯрғонтеппаи вилояти Хатлон) бунёд гардида, истеҳсоли шарбати меваю сабзавот дар 29 корхонаи саноатӣ ба роҳ монда шудааст. Дар корхонаҳои соҳаи хӯрокворӣ истеҳсоли консерваҳои гӯштӣ, меваю сабзавот, шарбатҳо, қайлаи помидор, орд, макарон, нону маҳсулоти нонӣ, обҳои маъданӣ, нӯшокиҳои ташнашикан, равғани растанӣ, намаки ошӣ ва дигар маводи озуқаворӣ дар корхонаҳои коркарди саноати хӯроквории ҷумҳурӣ вобаста ба талаботи бозор, мавҷудияти ашёи хом ва имкониятҳои молиявӣ ба роҳ монда шуда, ҷиҳати таъмини бозори дохилӣ бо намудҳои гуногуни маводи ғизоии саноатӣ корҳои муайян ба анҷом расонида мешавад. Дар тӯли 10 соли охир бозори дохилӣ бо обҳои маъданӣ, нӯшокиҳои ташнашикани ғайриспиртӣ, нӯшокиҳои спиртдор, спирти этилӣ, намаки ошию техникӣ, консерваҳои меваю сабзавот, шарбатҳо пурра таъмин гардида, қисми маҳсулоти истеҳсолгардида ба хориҷи кишвар ба фурӯш бароварда шуд. Бояд қайд кард, ки дар ҳама корхонаҳои соҳаи саноати хӯрокворӣ (гӯшту шир, меваю сабзавот, истеҳсоли равған, орд) иқтидорҳои истеҳсолӣ назар ба мавҷудияти ашёи хом 2-3 маротиба зиёд бунёд шуда, дар сурати таъмин шудани онҳо бо ашёи хом имконияти таъмини пурраи аҳолии ҷумҳурӣ бо маҳсулоти ғизоӣ ва афзун намудани содироти маҳсулоти ватанӣ пайдо мешавад.Дар ин бора аз котиботи Вазорати энергетика ва саноати Ҷумҳурии Тоҷикистон иттилоъ доданд.