Роҳхатҳои олимпии ҷадид барои Тоҷикистон

Душанбе, 11 май. ( АМИТ «Ховар», Аловиддин Бӯриев).- Дирўз Федератсияи байналмилалии дзю-до феҳристи барандагони роҳхати бозиҳои олимпиро ба нашр расонид. Дар феҳристи мазкур Расул Боқиев, дорандаи медали биринҷии бозиҳои олимпии Пекин-2008 ба таври мустақим ва Парвиз Собиров аз ҷониби Федератсияи дзю-дои Осиё ҳуқуқи ширкат дар Бозиҳои олимпии Лондон-2012-ро пайдо намуданд.Парвиз ба хотири он, ки дар мусобиқаи ниҳоии тахассусӣ барандаи медали нуқра гардид, тавонист ҷойи Муҳаммад Абдураҳмоновро дар ин ҷода иваз намояд. Ў дар Бозиҳои олимпӣ дар вазни 91 кило ҳунарнамоӣ хоҳад кард. Гузашта аз ин дар шаҳри Хелсинкии Финландия паҳлавонони Тоҷикистон Юсуф Абдусаломов, Зелимхон Юсуфов ва Николай Ноев дар охирин мусобиқаи ҷаҳонии интихобии олимпӣ доир ба гӯштии тарзи озод соҳиби роҳхатҳо ба Бозиҳои олимпии соли 2012 дар Лондон шуданд. Ҳамин тариқ, шумораи барандагони роҳхати Бозиҳои олимпӣ аз кишварамон ба 12 нафар расид. Ба ғайр аз дзю-дочиён ва паҳлавонони тарзи озод бо Искандари Рустам, инчунин Дилшод Назаров дар намуди гурзпартоӣ, Алишер Гулов, Фарҳод Неъматов дар риштаи таэквондо ВТФ, Ҷаҳон Курбонов, Анвар Юнусов, Собирҷон Назаров дар намуди бокс кишвари азизамонро дар Бозиҳои олимпии Лондон- 2012 муаррифӣ мекунанд.