«Ала» 101 кило каннабис ёфт

Душанбе, 2 август. (АМИТ «Ховар», Мавҷуда Анварӣ). – Зимни гузаронидани чорабиниҳои фаврию ҷустуҷӯӣ, ки дар доираи амалиёти «Кӯкнор — 2012» баргузор гардиданд, кормандони Раёсати Агентии назорати маводи нашъаовари назди Президенти Ҷумҳурии Тоҷикистон дар вилояти Хатлон бо ёрии саги хизматии ҷустуҷӯӣ бо лақаби «Ала» дар минтақаи байни деҳаҳои Кишт ва Дашти Ҷуми ноҳияи Шӯрообод аз махфигоҳи махсуси муҷаҳҳаз 7 халтаро, ки дар дохилашон маводи фишурдаи алафмонанди дорои бӯи махсус ҷойгир буд, дарёфт намуданд.Мутахассисони шӯъбаи ташхиси судии Раёсати АНМН дар вилояти Хатлон муайян карданд, ки маводи мусодирашуда воситаи нашъадори гурӯҳи каннабис буда, вазнаш бештар аз 101 килоро ташкил медиҳад.Аз рӯи ҳодисаи мазкур парвандаи ҷиноӣ оғоз гардидааст.