Барқароршавии муносибатҳои дипломатии Тоҷикистону Колумбия

Душанбе, 9 октябр. (АМИТ «Ховар»). – Тавре ки аз Раёсати иттилоот, матбуот, таҳлил ва тарҳрезии сиёсати хориҷии Вазорати корҳои хориҷии Ҷумҳурии Тоҷикистон ба АМИТ «Ховар» хабар доданд, дар шаҳри Ню – Йорк маросими имзои Эъломияи муштарак дар бораи барқарор намудани муносибатҳои дипломатии байни Ҷумҳурии Тоҷикистон ва Ҷумҳурии Колумбия баргузор гардид. Эъломияи муштаракро Намояндаи доимии Ҷумҳурии Тоҷикистон дар Созмони Милали Муттаҳид Сироҷиддин Аслов ва Намояндаи доимии Ҷумҳурии Колумбия дар ин созмон Нестор Осорио имзо намуданд. Баъди маросими имзои Эъломия сафирони Тоҷикистону Колумбия аз рӯи масоили роҳандозӣ ва рушди минбаъдаи муносибатҳои дӯстӣ ва ҳамкории мутақобилан муфиди байни ҳар ду кишвар, ҳамчунин перомуни масъалаҳои мухталифи рӯзномаи Созмони Милали Муттаҳид табодули афкор намуданд.