Вусъати корҳои бунёдкорӣ

Конибодом, 29 октябр. (АМИТ «Ховар», Мирзалӣ Амонов).-Дар шаҳри Конибодом бо маблағгузории соҳибкорон ва бо истифодаи технологияи аз ҷиҳати экологию ҳифзи муҳити зист боэътимод корхонаи нави истеҳсоли семент бунёд мегардад. Оғози фаъолияти навбати аввали корхона дар моҳи ноябр дар назар буда, 50 нафар коргару корманди муҳандисӣ соҳиби ҷои кор мешаванд. Иқтидори якрӯзаи корхона 250 тонна сементи навъи 400 аст. Дар ҷараёни корҳои созандагӣ дар баробари бунёди иншооти иҷтимоию маишӣ, сохтмони манзил вусъат ёфта, дар нуҳ моҳи соли равон дар шаҳру деҳоти Конибодом наздик ба 12 ҳазор метри мураббаъ хонаи истиқоматӣ бунёд гардид ва ҳоло дар маркази шаҳр бунёди ду бинои истиқоматии бисёрошёна идома дорад. Бо маблағгузории ҷумҳуриявӣ дар ҳаҷми 3 миллион сомонӣ, ҳамчунин маблағгузории мақомоти иҷроияи ҳокимияти давлатии вилоят кӯчаи марказӣ ва чанд кӯчаи асосии шаҳр дар масофаи умумии наздик ба 8 км пурра мумфарш шуд ва корҳои ободонӣ идома доранд.