Эмомалӣ Раҳмон ба фаъолияти мактаб – интернати ношунавоён оғоз бахшид

Душанбе, 1 ноябр. (АМИТ «Ховар», Дилшодаи Хайруллоҳ, Афшини Муқим)- Имрӯз дар ноҳияи Рӯдакӣ бо иштироки Президенти Ҷумҳурии Тоҷикистон Эмомалӣ Раҳмон мактаб- интернат барои кӯдакони ношунаво баъди навсозӣ ба фаъолият оғоз кард. Президенти кишвар Эмомалӣ Раҳмонро маҳассилини ин боргоҳ бо хушнудии хосса истиқбол намуда, бо имову ишораи хоси хеш ба Сарвари давлат барои ғамхории падарона изҳори сипос намуданд. Эмомалӣ Раҳмон бо шароит ва имкониятҳои ин мактаб – интернат аз наздик шинос шуда, барои баланд бардоштани сатҳи таълим дар ин мактаб — интернат дастуру супоришҳои мушаххас дод. Иттилоъ дода шуд, ки мактаб – интернат аз се бинои асосӣ — ду бинои таълимӣ ва як бинои хобгоҳ иборат буда, ҳамчунин барои ҷалби тарбиятгирандагон ба варзиш толори варзишӣ низ бунёд шудааст.   Қобили қайд аст, ки навсозии мактаб- интернат барои кӯдакони ношунаво дар ноҳияи Рӯдакӣ моҳи марти соли ҷорӣ оғоз гардидаву барои таҷдиди он Вазорати маорифи кишвар ва ҶДММ «Ситора – трейдинг» маблағгузорӣ намудаанд.