Фаронса дар Душанбе сафорати худро эъмор мекунад

Душанбе, 23 ноябр.(АМИТ «Ховар», Марзия Саидова).- Ояндаи наздик Фаронса дар Душанбе- пойтахти Тоҷикистон бинои сафорати худро бунёд месозад. Ин ва дигар масъалаҳои тавсеаи равобити ҳасанаи иқтисодиву тиҷоратӣ ва фарҳангию гуманитарии миёни Тоҷикистону Фаронса дар ҷараёни мулоқоти Маҳмадсаид Убайдуллоев –раиси шаҳри Душанбе ва Дидйе Леруаро –сафири фавқулодда ва мухтори Фаронса дар Тоҷикистон баррасӣ шуд. Шаҳрдори Душанбе таъкид кард, ки муносиботи дўстонаи Тоҷикистону Фаронса дар заминаҳои мухталиф ояндаи наздик бо фаъолияти густурдаи Дидйе Леруаро густариш ёфта, маҷрои нав касб хоҳад намуд. Дар ҷараёни мулоқот мусоҳибон доир ба ҷалбу тавсеаи фаъолияти ширкатҳои фаронсавӣ дар лоиҳаҳои инвеститсионӣ, хусусан лоиҳаҳое, ки ба рушди инфрасохтории шаҳри Душанбе нигаронида шудаанд, ҳамчунин ташкили корхонаҳои хурди муштараки саноатӣ табодули назар карданд.