Пардохти навбатии қарзи музди меҳнат

Душанбе, 24 декабр. (АМИТ «Ховар», Ибодат Давлатова).- Ба намояндагии Хадамоти муҳоҷирати назди Ҳукумати Ҷумҳурии Тоҷикистон аз шаҳри Самара шаҳрванди ҶТ Алишер Мавлонов муроҷиат намуда, хоҳиш кард, ки барои пардохти музди меҳнати ӯ ва бародараш Алиҷон, ки маблағи 140 000 рублро ташкил мекунад, ёрӣ расонанд. Тавре ки ба мухбири АМИТ «Ховар» аз Хадамоти муҳоҷират иттилоъ доданд, Мавлоновҳо аз моҳи марти соли ҷорӣ дар корхонаи сохтмонии » Сантекс», ки дар деҳаи ба номи К. Маркси шаҳри Жигулевскии вилояти Самара воқеъ гардидааст, фаъолият менамуданд. Дар ин давра ҳаҷми боқимондаи музди кори онҳо 140 000 рублро ташкил дод ва ин маблағ бо сабабҳои номаълум пардохт намешуд.Баъд аз суҳбат бо роҳбари корхонаи «Сантекс» музди меҳнати Мавлоновҳо пурра пардохта шуд.Ҳамчунин дар асоси аризаи муҳоҷири меҳнатӣ- шаҳрванди ҶТ, сокини деҳаи Ботурободи шаҳри Сарбанд Фирӯз Шоев, ки дар шаҳри Екатеринбурги вилояти Свердловск муваққатан фаъолияти корӣ дошт, кормандони Намояндагӣ бо корфармо шаҳрванди ФР Константин Александров суҳбат намуданд ва ба миқдори 30 ҳазор рубл қарзи музди маоши муҳоҷир пардохт шуд.