Қ. Расулзода: «Захираҳои истифоданашудаи иқтисодӣ зиёданд»

Душанбе, 22 январ. (АМИТ «Ховар», Бекназари Абӯбакр). – Фаъолияти минбаъдаи мақомоти иҷроияи ҳокимияти давлатии вилояти Суғд, ки дар партави суханронии Президенти Ҷумҳурии Тоҷикистон Эмомалӣ Раҳмон дар маҷлиси васеи Ҳукумати Тоҷикистон доир ба ҷамъбасти натиҷаҳои рушди иқтисодиву иҷтимоии мамлакат дар соли 2012-ум ва вазифаҳо барои соли 2013 муайян гардид, 21 январ дар ҷаласаи кории назди раиси вилояти Суғд Қоҳир Расулзода баррасӣ шуд. Қоҳир Расулзода аз ҷараёни маҷлиси ҷамъбастии Ҳукумати мамлакат гузориш дода, таъкид кард, ки бо вуҷуди ба фаъолияти мақомоти иҷроияи ҳокимияти давлатии вилоят дар ҷаласаи ҷамъбастӣ аз рӯи натиҷаҳои иқтисодиву иҷтимоӣ баҳои мусбат додан, дар вилоят ҳанӯз ҳам захираҳои фаровони истифоданашудаи афзоиши иқтидори иқтисодию иҷтимоӣ вуҷуд доранд. Аз хадамоти матбуоти раиси вилояти Суғд ба АМИТ «Ховар» иттилоъ доданд, ки раиси вилоят дар ин замина дар бораи вазифаҳои минбаъда муфассал сухан ронда, қайд кард, ки Сардори давлат тақозо намуд, ки ҷараёни ислоҳоту дигаргунсозиҳо дар тамоми самтҳо, бахусус дар таъмини беҳбуди фазои сармоягузорӣ, рушди бахши хусусӣ ва соҳибкорӣ, афзун намудани истифодаи самараноки моликияти давлатӣ, инчунин дастрасӣ ба бозорҳои сармоя ва молу маҳсулот ҳамаҷониба татбиқ шаванд. Раиси вилоят роҳбарони сохторҳои марбутаро ба таъмини иҷрои босифати нақшаи қисми даромади буҷаи давлатӣ, аз ҷумла дарёфти манбаъҳои нави ғанигардонии буҷа ва воридоти гумрукӣ вазифадор намуд.