Ёдбуди Султон Сафар дар Душанбе

Душанбе, 26 январ. (АМИТ «Ховар», Баҳманёр Муродов).- Пагоҳ, 27 январ дар театри давлатии ҷавонон ба номи Маҳмудҷон Воҳидов маҳфили ёдбуди Арбоби ҳунари Тоҷикистон, нависанда ва драмнависи машҳур Султон Сафар баргузор мегардад. Гуфта мешавад, ки дар ин маҳфил аҳли адаби кишвар ва шогирдони ӯ иштирок хоҳанд кард. Султон Сафар баъди хатми Омӯзишгоҳи олии театрии ба номи Шепкини Москав аввал ба ҳайси ҳунарпешаи театри ҷавонон ва Театри академии драмавии ба номи Лоҳутӣ фаъолият карда, баъдан дар Раёсати санъати Вазорати маданияти ҶШС Тоҷикистон, сармуҳаррири Кумитаи давлатии телевизион ва радиошунавонӣ, муҳаррири калони вазорати маданият ва дигар вазифаҳои ҷамъиятиву давлатӣ кор кардааст. Ҳамчунин хизмати ӯ дар соҳаи драматургияи тоҷик низ бузург аст. Драмаҳои машҳури Султон Сафар «Қарзи виҷдон», «Қасос», «Абадзинда», «Гирдоб», «Алафҳои бегона», «Муҳаббат ва адолат» мавзӯъҳои муҳими зиндагиро дар бар гирифтаанд. Арбоби ҳунар, узви Иттифоқи нависандагони Тоҷикистон Султон Сафар соли 1935 дар ноҳияи Айнӣ чашм ба олам гузошта, соли 2008 баъди бемории тӯлонӣ дар Душанбе вафот кардааст.