«Дар дарвозаи Шарқ»

Душанбе, 15 феврал.(АМИТ «Ховар», Марзия Саидова).- Нашриёти «Орбита»-и Душанбе китоби таърихнигорон ва муҳаққиқони тоҷик Виктор Дубовитский, Ирина Дубовитская ва Ғафур Шерматовро бо номи «Дар дарвозаи Шарқ» дар тарҷумаи Абдулҳай Комилӣ ба тозагӣ аз чоп баровард. Китоби мазкур, ки аз маҷмӯаи очеркҳои таърихӣ иборат аст, заҳмати 30 солаи муаллифон буда, дар он муносибатҳои халқҳои Русия ва Осиёи Марказӣ, ки ҷараёни он таърихи ҳазорсола дорад, инъикоси худро ёфтааст. «Дар дарвозаи Шарқ» ҳамзамон дар асоси чандин маводи таърихии рӯзномаҳои ҷумҳуриявӣ навишта шудааст ва хонандагон имкон доранд доир ба бисёр масъалаҳои муосири марбут ба муносиботи Тоҷикистону Русия маълумоти зарурӣ пайдо намоянд. Китоби мазкур барои доираи васеи хонандагон, бахусус донишҷӯёну устодони бахши таърих ва кулли шахсоне, ки ба таърихи муносиботи Тоҷикистону Русия таваҷҷуҳ доранд, тавсия мешавад.14.55.