Густариши ҳамкориҳои Эрону Тоҷикистон дар мубориза бо маводи мухаддир

Душанбе, 11 феврал. (АМИТ «Ховар», Баҳманёр Муродов).- Директори Агентии мубориза бар зидди маводи мухаддири назди Ҳукумати Ҷумҳурии Тоҷикистон Рустам Назаров дар Теҳрон бо Мустафо Муҳаммад Наҷор, вазири корҳои дохилии Эрон масоили ҳамкориҳои ду кишварро дар бахши мубориза бар зидди маводи мухаддир баррасӣ намуданд. Ба иттилои Агентии иттилоотии Ирон «Форс» вазири корҳои дохилии Ирон гуфтааст, ки ҳарду кишвар дар оянда, дар самти мубориза бар зидди маводи мухаддир ҳамкории густардаро ба роҳ хоҳанд монд. Ҳамчунин Мустафо Муҳаммад Наҷор афзудааст, ки ба қаламрави ҳарду кишвар асосан маводи мухаддир аз марзи Афғонистон мегузарад ва бояд барои пешгирии вуруди ғайриқонунии маводи мухаддир Тоҷикистону Эрон якҷоя мубориза баранд.