Беҳтарин паҳлавонон дар Наврӯзгоҳ қувва меозмоянд

Душанбе, 18 март.(АМИТ «Ховар», Марзия Саидова).- Бахшида ба ҷашни байналмилалии Наврӯз рӯзҳои 24 ва 25 марти соли равон соати 10:00 дар Наврӯзгоҳи пойтахт мусобиқаи кушоди пойгаи равон ва гӯштини миллӣ гузаронида мешавад. Дар ин хусус раиси шаҳри Душанбе Маҳмадсаид Убайдуллоев қарор ба тасвиб расонд. Дар асоси ин қарор раиси шаҳр ба сохторҳои марбутаи пойтахт супориш додааст, ки барои ташкил ва гузаронидани мусобиқаҳои пойгаи равон ва гӯштини миллӣ аз буҷаи пойтахт беш аз 109 ҳазор сомонӣ ҷудо намоянд. Ҳамзамон сохторҳои дахлдори пойтахт муваззаф гардидаанд, ки ба ин мусобиқот беҳтарин аспсаворон, варзишгарон ва паҳлавононро аз минтақаҳои мухталифи кишвар даъват ва ҷалб созанд.