Сигор сабабгори марг шуд

Душанбе, 5 март. (АМИТ «Ховар», Баҳманёр Муродов ).-Кашидани сигор дар ҷойгаҳи хоб ҳангоми сархушӣ боиси сар задани сӯхтор дар манзили истиқоматии як сокини вилояти Суғд гардид. Дафтари матбуоти Вазорати корҳои дохилӣ иттилоъ додааст, ки шоми 2-юми марти соли равон, соати 19:44 дар манзили истиқоматии Комилҷон Ваҳҳобов, cокини кӯчаи Маърифат, хонаи 18-и ноҳияи Бобоҷон Ғафурови вилояти Суғд сӯхтор ба амал омада, дар натиҷа 30 метри мураббаъ аз масоҳати ҳуҷраи истиқоматӣ бо молу ашёҳои рӯзгори соҳибхона зарар дидааст. Ҳамчунин қисми зиёди бадани Комилҷон Ваҳҳобов дар оташ сӯхта, дар ҷойи ҳодиса то расидани оташнишонон ба ҳалокат расидааст.