100 компютери нав барои донишгоҳ

Душанбе, 11 апрел. (АМИТ «Ховар», Раъно Нусратуллоева).-Тавре ки котиби матбуотии Донишгоҳи давлатии омӯзгории Тоҷикистон ба номи С.Айнӣ Бахтиёри Абдураҳим ба хабарнигори АМИТ «Ховар» хабар дод, баҳри таҳкими заминаи техникии донишгоҳ 100 адад компютер ва 20 адад принтер харидшуд.  Дар ҷамъомаде, ки бахшида ба тақсими компютерҳо доир гардид, ректори донишгоҳ Абдуҷаббор Раҳмонов зикр кард, ки ин компютерҳо вобаста ба дархости сохторҳои донишгоҳ тақсимбандӣ шудаанд ва дар нақша ҳаст, ки ба наздикӣ боз 150 адад компютери дигар харидорӣ намоянд.Дар такя бар гуфтаи сарвари таълимгоҳ, раёсати донишгоҳ кӯшиш ба харҷ медиҳад, то дар ояндаи наздик дар маърифатгоҳамон барои ҳар се нафар донишҷӯ як компютер бошад. Дар асоси нақшаи дурнамои донишгоҳ дар соли 2020 шумораи компютерҳои таълимгоҳ чандин баробар афзоиш дода мешавад, ки ба ҳар нафар донишҷӯ як адад рост меояд. Бино бар иттилои ректор, вазири маорифи кишвар ваъда дода, ки барои донишгоҳ 13 тахтаи электронӣ тақдим хоҳад кард. Таҷҳизи сохторҳои донишгоҳ имкон фароҳам меорад, ки омӯзгорону донишҷӯён ба технология навин дастрасии бештар пайдо кунанд.