Омодагиҳо ба гузаронидани соли байналмилалии ҳамкориҳо дар соҳаи об

Душанбе, 9 апрел. (АМИТ»Ховар»). Имрўз дар ҳузури Сарвазири Ҷумҳурии Тоҷикистон Оқил Оқилов ҷаласаи дуюми кумитаи тадорукоти омодагӣ ва гузаронидани чорабиниҳо дар доираи соли байналмилалии ҳамкориҳо дар соҳаи об, 2013 баргузор гардид. Дар ҷаласа рафти омодагӣ ба баргузории конференсияи байналмилалии сатҳи баланд оид ба ҳамкорӣ дар соҳаи об, 2013, ки моҳи августи соли равон дар шаҳри Душанбе доир мегардад мавриди баррасӣ қарор гирифта ҷараёни иҷрои нақшаи чорабиниҳои аз замони баргузории ҷаласаи нахустини кумитаи тадорукот ҷиҳати дар сатҳи баланд гузаронидани конференсияи байналмилалӣ тарҳрезӣ гардида натиҷагирӣ карда шуд. Бо натиҷагирӣ аз рафти омодагиҳо ба конференсияи байналмилалии сатҳи баланд оид ба ҳамкорӣ дар соҳаи об, 2013 Сарвазири мамлакат Оқил Оқилов аъзои кумитаи тадорукотро вазифадор кард, ки дар мўҳлати кўтоҳ рўйхати иштирокчиён, даъвати намояндагони олимақоми давлатҳои хориҷӣ, ташкилоту созмонҳои бонуфузи ҷаҳонӣ ва коршиносону мутахассисони варзидаи соҳаи обро таъмин намуда барои таҳрезии нақша ва барномаи кории конференсия, таҳияи мавзўҳои дар он баррасишаванда ва рамзи баргузории конференсияи байналмилалӣ тадбирҳои зарурӣ андешанд. Ҳамчунин роҳбарони вазорату идораҳои дахлдори мамлакат вазифадор гардиданд, ки то рўзи баргузории конференсияи байналмилалӣ дар шаҳри Душанбе гузаронидани машварату мизҳои муддавар ва озмуну маҳфилҳои ноҳиявию шаҳриро ба нақша гирифта оид ба масъалаи об ва муҳимияти ҳамкорӣ дар ин соҳа корҳои таблиѓотиро вусъат бахшанд.