Даъвати довталабон барои таҳсил дар Русия

Душанбе,16 май. (АМИТ «Ховар», Фарзонаи Давлат)- Вазорати корҳои дохилии Тоҷикистон дар асоси шартномаи худ бо Федератсияи Русия барои таҳсил дар муассисаҳои олии таълимии Вазорати корҳои дохилии Федератсияи Русия дар шаҳрҳои Маскав, Санкт-Петербург, Воронеж, Орел, Волгоград, Урал, Сибири Шарқӣ аз рӯи ихтисосҳои «Ҳуқуқшинос», «Экспертизаи судӣ», «Руҳшинос» қабули довталабонро барои таҳсил дар ин муассисаҳо эълом медорад. Тавре ки дар ин бора сомонаи Вазорати корҳои дохилӣ хабар додааст, қабули ҳуҷҷатҳо то 1-уми июни соли 2013 дар шуъбаҳои корҳои дохилии ҷои истиқомат ба расмият дароварда мешаванд.Шарту шароитҳои таҳсил дар муассисаҳои олии хориҷи кишвар чунин аст: донистани забони русӣ ҳатмист, таҳсил дар муассисаҳои олии хориҷи кишвар, истифодаи толорҳои варзишӣ, китобхонаҳо, ёрии аввалини тиббӣ, идрорпулӣ ва истифодаи воситаҳои нақлиёт бо мақсади таҳсил ба тариқи ройгон сурат мегирад. Корҳои шахсии довталабон бо забони русӣ ва тоҷикӣ тибқи талаботи муқарраргардида дар шуъбаи корҳои дохилии ҷои истиқомат ба расмият дароварда мешаванд.