Раиси Парлумон аз дастоварду мушкилоти Рашт воқиф гардид

Душанбе, 3 май.(АМИТ «Ховар», Марзия Саидова).- Раиси Маҷлиси намояндагони Маҷлиси Олии ҷумҳурӣ Шукурҷон Зуҳуров дар доираи сафари худ ба ноҳияҳои минтақаи Рашт бо фаъолон, роҳбарони ташкилоту идораҳои минтақавию ноҳиявӣ ва сокинони он вохӯрда, доир ба масъалаҳои муҳими ҳаёти иқтисодию иҷтимоии ин минтақа ва нуктаҳои асосии Паёми Президенти Ҷумҳурии Тоҷикистон Эмомалӣ Раҳмон ба Маҷлиси Олии Ҷумҳурии Тоҷикистон ибрози назар намуд. Шукурҷон Зуҳуров Паёми Президенти Ҷумҳурии Тоҷикистон Эмомалӣ Раҳмонро ба Парлумони мамлакат рӯйдоди муҳими таърихӣ маънидод карда афзуд, ки дар Паём самтҳои асосии рушди соҳаҳои гуногуни ҷомеаи кишварамон арзёбӣ гардида, дурнамои фаъолияти ин соҳаҳо тарҳрезӣ мешаванд.Дар вохӯрӣ инчунин дар бораи дастовард ва мушкилоти сокинони минтақаи Рашт, истифодаи сарфакоронаи нерӯи барқ, ҷалби ҷавонон, хусусан духтарон ба таълим ва азхудкунии илмҳои муосир, иштироки фаъолона дар корҳои бунёдкориву созандагӣ, ободии диёри хеш, фароҳам овардани шароити мусоид барои соҳибкорони худӣ, таъсиси ҷойҳои нави корӣ, истифодаи муассир аз ҳар қитъа замин, истеҳсоли маҳсулоти сифатноки кишоварзӣ ва дар ин замина баланд бардоштани сатҳи зиндагӣ ва некӯаҳволии мардум табодули назар карда шуд. Зикр гардид, ки роҳбарияти давлату ҳукумати Тоҷикистон тӯли солҳои охир ҷиҳати баланд гардидани сатҳи зиндагии аҳолӣ тадбирҳои муҳим меандешад. Дар фарҷом миёни раиси палатаи поёнии Парлумони мамлакат бо сокинони ноҳия табодули афкор сурат гирифт.