Кӯмаки БРО барои беҳдошти роҳҳои Тоҷикистон

Душанбе, 26 сентябр. (АМИТ «Ховар», Пайрав Назаров). – Бонки рушди Осиё қарзи бебозгашт дар ҳаҷми 70 миллион доллари ИМА – ро барои лоиҳаи рушди ҳамкории иқтисодии минтақавии Тоҷикистон маъқул ёфт. Мақсад аз ин лоиҳа беҳтар намудани роҳҳо, баланд бардоштани бехатарӣ ва хидматрасонии техникии онҳо, ҳамчунин рушди иҷтимоии аҳолии маҳаллӣ мебошад.  Тавре ки аз намояндагии Бонки рушди Осиё дар Тоҷикистон хабар доданд, дар ҳошияи ин лоиҳа амнияту хидматрасонии техникии масофаи тақрибан 88 километри роҳи Сайрон – Карамиқ ва масофаи 87 километри роҳи Восеъ — Ховалинг беҳтар карда мешавад. Барои татбиқи ин лоиҳа Ҳукумати Тоҷикистон аз ҷониби худ 19 миллион доллари ИМА ҷудо мекунад. Вазорати нақлиёти ҷумҳурӣ агентии иҷрокунандаи ин лоиҳа ба шумор меравад.