Мулоқот бо муҳоҷирони меҳнатӣ

Душанбе, 8 октябр. (АМИТ «Ховар», Лутфия Эшонқулова).-Дар доираи корҳои фаҳмондадиҳӣ кормандони Намояндагии Хадамоти муҳоҷирати назди Ҳукумати ҶТ дар ФР С.Боев ва И.Ахмедов дар шаҳри Шелково бо як гуруҳ муҳоҷирони меҳнатӣ мулоқот намуданд.Тавре ки Хадамоти матбуоти намояндагии мазкур хабар медиҳад, онҳо вобаста ба навгониҳои қонунгузории федералӣ, аз ҷумла афзоиши ҷарима барои қоидавайронкунии маъмурӣ дар шаҳру вилояти Маскав ва Санкт-Петербург, сабабҳои манъи вуруди бархе аз шаҳрвандони ҶТ ба ҳудуди ФР муфассал сухан ронданд.Бояд зикр кард, ки дар шаҳри Шелково бештар 1000 шаҳрванди тоҷик кору иқомат дошта, асосан дар бахши сохтмон, тиҷорат, хизматрасонӣ, нақлиёт фаъолият мекунанд. Дар ин ҷо аз минтақаҳои гуногуни Тоҷикистон муҳоҷирони меҳнатӣ дар ҳамбастагӣ фаъолият дошта, дар мавридҳои зарурӣ мушкилоти ба миёномадаро дар ҳамкорӣ ҳал менамоянд. Зимни суҳбат ҳамчунин доир ба дастовардҳои даврони соҳибистиқлолии кишвар, кӯшишу талошҳои Ҳукумати Тоҷикистон дар бобати таъмини шароити хуби кору иқомат дар ФР барои шаҳрвандони тоҷик иттилоъ дода шуд.