С. Наришкин зимни сафараш аз пойгоҳи низомӣ ҳам боздид менамояд

Душанбе, 4 октябр.(АМИТ «Ховар», Марзия Саидова). -Сергей Наришкин, раиси Думаи давлати Маҷлиси Федеролии Федератсияи Русия 6 октябр бо сафари расмӣ озими Душанбе-пойтахти Тоҷикистон мегардад. Дар ин хусус аз палатаи поёнии Парлумони мамлакат ба АМИТ «Ховар» иттилоъ доданд.  Тибқи барномаи сафари расмии раиси Думаи давлатӣ ба Тоҷикистон — Сергей Наришкин ҳамчун рамзи эҳтиром ба таърихи миллати тоҷик дар пояи муҷассамаи нахустин асосгузори давлати тоҷикон шоҳ Исмоили Сомонӣ гулчанбар мегузорад. Инчунин раиси Думаи давлатӣ бо Эмомалӣ Раҳмон -Президенти Ҷумҳурии Тоҷикистон, Маҳмадсаид Убайдуллоев -раиси Маҷлиси миллӣ ва Шукурҷон Зуҳуров-раиси Маҷлиси намояндагони Маҷлиси Олии Ҷумҳурии Тоҷикистон мулоқот намуда, масъалаҳои тавсеаи ҳамкории байнипарлумонии Тоҷикистону Русия ва соири масоили марбут ба таҳкими муносиботи ҳасанаи Душанбеву Маскавро матраҳ хоҳанд кард.  Сергей Наришкин дар доираи сафараш ба Тоҷикистон аз пойгоҳи низомии 201-уми Русия мустақар дар Тоҷикистон дидан намуда, зимни боздид аз Донишгоҳи славянии Тоҷикистону Русия бо ҳайати устодону донишҷӯёни ин даргоҳи маърифат мулоқот менамояд. Интизор меравад, ки дар Донишгоҳи славянии Тоҷикистону Русия Сергей Наришкинро бо дипломи доктори ифтихории Донишгоҳи славянии Тоҷикистону Русия сарафроз гардонанд.