Ҷамъбасти фаъолияти Хадамоти муҳоҷират дар соли 2013

Душанбе, 7 январ. (АМИТ«Ховар», Лайло Қосимова). -7 январи соли 2014 дар Хадамоти муҳоҷират ҷаласаи ҷамъбастии фаъолияти Хадамоти муҳоҷират дар соли 2013 ва нақшаи фаъолияти он дар соли 2014 баргузор гардид. Дар он сардори Хадамоти муҳоҷират Анвар Бобоев, сардори Сарраёсат, сардорони раёсатҳои Хадамоти муҳоҷират дар вилояти Суғд, ВМКБ, Хатлон, Душанбе ва шаҳру ноҳияҳои тобеи ҷумҳурӣ, директори Корхонаи воҳиди давлатии «Тоҷикхориҷакор» ва сармуҳаррири рӯзномаи «Муҳоҷир» иштирок намуданд.Сардори Хадамоти муҳоҷират Анвар Бобоев зикр кард, ки вазифаҳои асосии Хадамоти муҳоҷират танзими муҳоҷирати меҳнатии шаҳрвандони Ҷумҳурии Тоҷикистон ба хориҷа, таълими касбии муҳоҷирони меҳнатӣ, бо кор таъмин кардани шаҳрвандон дар хориҷи кишвар, робита бо ҳамватанони бурунмарзӣ, муҳоҷирати меҳнатии шаҳрвандони хориҷӣ дар Ҷумҳурии Тоҷикистон мебошад. Хадамот бо ин мақсад, тайи соли ҷорӣ якчанд лоиҳаи созишномаҳоро бо давлатҳои хориҷи дуру наздик таҳия ва такмил дода, барои мувофиқа ва омўзиши тарафҳо, тибқи муқаррарот унвонии Давлати Қатар, Аморати Муттаҳидаи Араб, Кореяи Ҷанубӣ, Ҷумҳурии Украина ирсол намуд. Дар ҷаласа оид ба ҳалли мактуб ва арзу шикоятҳои муҳоҷирони меҳнатӣ, баргардонидани музди маоши онҳо, бастани шартномаи корӣ, аз байн бурдани маҳалчигӣ дар байни ҳамватанони бурунмарзӣ сухан рафт.