Ширкати 300 хонанда дар олимпиада

Хоруғ, 24 январ. (АМИТ «Ховар», Файз Мирасан).-Дар мактаби президентии шаҳри Хоруғ даври сеюми олимпиадаи толибилмони макотиби таҳсилоти миёнаи умумии вилоят оғоз шуд. Беш аз 300 нафар толибилмони макотиби таҳсилоти миёнаи умумии шаҳру навоҳии вилоят барои иштирок дар олимпиадаи вилоятӣ роҳхат гирифтанд. Ғарибшо Ғарибшоев-сардори Раёсати маориф ва илми вилоят дар мавриди дастовардҳои соҳаи маориф дар чанд соли охир ба таври мушаххас изҳори назар карда, аз ҳамкории омӯзгорону волидайн дар маҳаллаҳо изҳори сипос кард. Ба гуфтаи Ғарибшоев дар соли гузашта хонандагони макотиби вилоят наздик ба 30 медали тилло ба даст оварданд. Дар асоси Низомномаи Вазорати маорифи ҷумҳурӣ қарор шудааст, ки дар олимпиадаи вилоятӣ ду даста байни ҳам сабқат кунанд. Дастаи аввал аз ҳисоби мактаби президентӣ ва мактаб-литсейи Оғохон, дастаи дуюм аз номи макотиби таҳсилоти миёнаи умумии вилоят иштирок мекунад.