Тоҷикистону Афғонистон ҳавасманди тақвияти мубориза бар ҷинояткорӣ

Душанбе, 14 январ. (АМИТ «Ховар», Лутфия Эшонқулова).- Ҳамкориҳои мутақобилан судманди Тоҷикистон ва Афғонистон, бахусус дар самти мубориза бар зидди ҷинояткорӣ 13 январ зимни мулоқоти вазири корҳои дохилии Тоҷикистон Рамазон Раҳимов бо Сафири фавқулодда ва мухтори Ҷумҳурии Исломии Афғонистон дар Тоҷикистон Абдулғафур Орзу баррасӣ гардиданд.Сомонаи расмии ВКД хабар медиҳад, ки аз ҷумла дар ин мулоқот ҷонибҳо масъалаҳои мушаххаси самтҳои гуногуни ҳамкориҳо, аз қабили самти мубориза бар зидди ҷинояткорӣ — терроризм, экстремизм, гардиши ғайриқонунии маводи мухаддир, хариду фурўши ғайриқонунии яроқу аслиҳа ва амсоли инҳоро муҳокима намуда, доир ба он табодули назар карданд. Рамазон Раҳимов қайд кард, ки лоиҳаи Созишнома оид ба ҳамкорӣ байни вазоратҳои корҳои дохилии ду кишвар омода шудааст ва дар сурати ба имзо расидани он ҳамкориҳои дуҷониба боз ҳам рушду такомул хоҳанд ёфт. Абдулғафур Орзу дар навбати худ зикр намуд, ки онҳо низ омодаанд дар мубориза бар зидди ҷинояткорӣ бо Вазорати корҳои дохилии Тоҷикистон ҳамкории бештар дошта бошанд.