Тоҷикистону Чин имкониятҳои фаровон доранд

Душанбе, 14 январ. (АМИТ «Ховар», Кристина Эрлих).- 13 январ раиси Палатаи савдо ва саноати ҶТ Шариф Саид ва Сафири ҶМЧ дар Тоҷикистон Фан Сянжун мулоқот анҷом намуданд. Дар ин бора аз маркази матбуоти ПСС ҶТ ба АМИТ «Ховар» хабар доданд.Дар ҷараёни мулоқот масоили вазъи ҳамкории тиҷоратию иқтисодии Тоҷикистон ва Чин, ҳамчунин дурнамои рушди равобити мутақобилан муфид дар самтҳои афзалиятнок мавриди муҳокима қарор гирифтанд.«Муомилоти савдои хориҷии Тоҷикистон бо ҶМЧ сол аз сол густариш меёбад. Байни ҶМЧ ва Тоҷикистон дӯстии чандинасраи анъанавӣ идома дорад. Президенти ҶТ Эмомалӣ Раҳмон ба робитаҳои ҳар ду кишвар аҳамияти хоса зоҳир менамояд. Мувофиқи суханони президент кишвар, Чин аз ҷумлаи шарикони калонтарини Тоҷикистон дар бахши савдои хориҷӣ ба шумор меравад. Густаришу таҳкими равобити иқтисодӣ бо ҶМЧ яке аз шартҳои муҳимтарини рушди босуръати ҷумҳурӣ маҳсуб меёбад», — гуфт Шариф Саид. Фан Сянжун дар навбати худ изҳор дошт, ки ба туфайли сарони ҳар ду кишвар равобити тиҷоратию иқтисодӣ муваффақона мустаҳкам гардида, тайи солҳои гузашта натиҷаҳои хуб ба даст омадаанд. Дипломати Чин аҳамияти дар Тоҷикистон доир намудани намоишгоҳҳо, ҳамчунин иштироки сохторҳои тиҷоратии Тоҷикистон дар ярмаркаҳои ҳарсолаи Урумчи ва Қошғарро ба таври махсус қайд намуд.