Ярмаркаи беҳтарин ниҳолҳо дар пойтахт

   Душанбе, 21.02.2014. (АМИТ «Ховар», Муқаддас Темурзода).-Бо мақсади сарсабзии маҳаллаву шаҳракҳо ва таъмини минтақаҳои кабудизоршаванда бо ниҳолҳои ороишии ҳамешасабз, мевадиҳанда ва сояафкан бо пешниҳоди Вазорати кишоварзӣ ва дар асоси Қарори раиси шаҳри Душанбе 22 феврали соли ҷорӣ дар назди майдони марказҳои савдои «Ганҷина» ва «Панҷшер»-и пойтахт ярмаркаи фурўши ниҳолҳо ва тухми зироатҳо доир мегардад. 
Дар ярмарка 3 хоҷагии ниҳолпарварии вилояти Хатлон, 7 хоҷагии  ниҳолпарварии Корхонаи воҳиди давлатии ҷумҳуриявии «Ниҳолпарвар», хоҷагиҳои ниҳолпарварии Агентии хоҷагии ҷангал ва соҳибкорони инфиродие, ки ба парвариши ниҳол ва гулу сабза машғуланд, иштирок намуда, беҳтарин намуди ниҳол ва анвои гуногуни тухми зироатҳоро пешкаши харидорон менамоянд.
     Сардори бахши иттилооти Раёсати ҳифзи муҳити зисти шаҳри Душанбе Саидаҳмади Акрампур ба мухбири АМИТ «Ховар» иттилоъ дод, ки ҳамасола дар моҳи феврал бо дастгирии раиси шаҳри Душанбе Маҳмадсаид Убайдуллоев ярмаркаи ниҳолҳо доир мегардад. Дар ярмаркаи имсола накамтар аз 1 млн. ниҳолҳои ороишии ҳамешасабз, мевадиҳанда, сояафкан, гулу бутта ва тухми зироатҳо пешниҳоди харидорон мегардад. Инчунин, дар ин маърака олимону мутахассисони соҳа ба шаҳрвандон роҷеъ ба парвариши ниҳолҳо ва зироатҳо маслиҳатҳо хоҳанд дод.