Қомуси ёдгориҳои таърихии халқи тоҷик рӯи чоп меояд

Душанбе, 19.03.2014 (АМИТ «Ховар», Фарзонаи Давлат).- Президенти кишвар Эмомалӣ Раҳмон дар мулоқоти соли гузашта бо зиёиёни кишвар дар арафаи ҷашни Наврӯз масъулини соҳа ва олимони Академияи илмҳои ҷумҳуриро вазифадор кард, ки бо мақсади ташвиқу тарғиби арзишҳои таърихиву фарҳангии кишвар Қомуси ёдгориҳои таърихии халқи тоҷикро таҳия ва нашр намоянд.
Оё нашри  қомуси мазкур роҳандозӣ гардидааст ва ё не? Ба ин саволи хабарнигори АМИТ «Ховар» Президенти Академияи илмҳои Тоҷикистон (АИТ) Фарҳод Раҳимов чунин посух дод: 
-Оид ба ин масъала ҳаминро гуфта метавонам, ки гурӯҳи корӣ аз олимони варзидаи соҳаи таърих таъсис дода шудааст ва худи ман бевосита онро назорат дорам. Дар доираи ин чорабинӣ чанд барномаро амалӣ карданием: якум омўзиши таърихи фарҳанги бостоншиносии  Тоҷикистон, махсусан фарҳанги бостоншиносии водии Ҳисор. Ин Шўро аз Файзобод то Туркманистон меравад. Имрўз аллакай олимон исбот кардаанд, ки фарҳанги бостоншиносии Ҳисор таърихи 6 ҳазорсола дорад, агарчи мо  3 ҳазорсолагии шаҳраки Ҳисорро ҷашн мегирем. Он ҷустуҷӯҳо, яъне он дарёфтҳое, ки ҳастанд, бозгўи ин гуфтаҳо мебошанд.  
Нисбат ба Қомуси ёдгориҳои таърихӣ ҳаминро гуфтаниам, ки гурўҳи корӣ болои он фаъолият дорад ва ҳайати онро бевосита олимони шинохтаи Институти таърих, бостоншиносӣ ва мардумшиносии ба номи Аҳмади Дониши АИТ бо роҳбарии академик Раҳим Масов ташкил менамоянд. Эҳтимол қомус дар якчанд ҷилд нашр гардад ва то охири сол ҷилди аввали он омода ва нашр мешавад.