Фарҳанги гӯишҳои ҷанубии забони тоҷикӣ

Душанбе, 31.03.2014.(АМИТ «Ховар», Марзия Саидзода).-Чопхонаи «Пайванд» «Фарҳанги гӯишҳои ҷанубии забони тоҷикӣ»-ро нашр намуд. Фарҳанги мазкур бо иқдоми Пажӯҳишгоҳи забон, адабиёт, шарқшиносӣ ва мероси хаттии ба номи А. Рӯдакии Академияи илмҳои Ҷумҳурии Тоҷикистон ва Пажӯҳишгоҳи фарҳанги форсӣ- тоҷикии Сафорати Эрон дар Тоҷикистон мунташир гардид. Донишмандони тоҷик Мансур Маҳмудов, Ғаффор Ҷӯраев ва Баҳром Бердиев мураттибони фарҳанг мебошанд. «Фарҳанги гӯишҳои ҷанубии забони тоҷикӣ»- беш аз 25 ҳазор калима ва ибораро дар бар гирифта, дар заминаи зиёда аз 100 ҳазор маводи захираи картотека, ки мураттибон аз маҳаллаҳои минтақаи ҷанубии Тоҷикистон дар солҳои гуногун гирдоварӣ намудаанд, таҳия шудааст. Фарҳанг барои доираи васеи мутахассисон, адибон, муаллимон ва онҳое, ки ба дурдонаҳои забони халқ ҳавасмандӣ доранд, пешниҳод мегардад.