Иди байналмилалии Наврӯз дар Брюссел таҷлил гардид

Душанбе, 27.03.2014 (АМИТ “Ховар”).- 25 марти соли 2014 дар ш.Брюссел дар қасри «Kasteel Van Huizingen» ба муносибати Рӯзи байналмилалии Наврӯз зиёфати бошукӯҳ баргузор гардид. Чорабинии мазкур бо ташаббуси Сафорати Ҷумҳурии Исломии Афғонистон ва Ҷумҳурии Тоҷикистон дар якҷоягӣ бо сафоратҳои Озарбойҷон, Қирғизистон, Туркманистон ва Туркия дар Шоҳигарии Белгия ороста шуд.Дар маросими ҷашни Наврӯз роҳбарони намояндагиҳои дипломатии кишварҳои хориҷии муқими Белгия, намоянадгони доимӣ дар назди СААШ ва Иттиҳоди Аврупо, шахсони расмии Вазорати корҳои хориҷии кишвари иқомат, Иттиҳоди Аврупо, СААШ, Паймони нерӯ, Шӯрои Аврупо, вакилони Парлумони Аврупо, намояндагони доираҳои соҳибкорӣ, илмӣ, фарҳангӣ ва воситаҳои ахбори оммаи Аврупо, инчунин донишҷӯён аз Тоҷикистон ва аъзои диаспораи тоҷик дар Белгия, Нидерланд ва Люксембург ширкат варзиданд.Бо сухани ифтитоҳӣ Сафири Фавқулода ва Мухтори Туркманистон дар Шоҳигарии Белгия Какаджан Моммадов (дуайен) баромад карда, меҳмононро аз номи сафирони кишварҳои-ташкилкунандаи ин ҷашн хайрамақдам ва бо иди баҳор табрик гуфт. Ӯ дар бораи таърихи пайдошавии ҷашни Наврӯз, анъанаву хусусиятҳои он маълумот дод. Дар назди ҳозирин ҳамчунин Сафири Фавқулода ва Мухтори Афғонистон дар Шоҳигарии Белгия Ҳумоюн Тандар бо сухани табрикӣ баромад намуда, дар бораи ҷашнгирии Рӯзи байналмилалии Наврӯз дар пойтахти Афғонистон ш.Кобул 27 марти соли ҷорӣ хабар дод. Дар рафти базми идона ба меҳмонон таомҳои миллӣ, меваҳо ва шириниҳои кишварҳои созмондиҳандаи чорабинии мазкур пешкаш карда шуд.