Иштироки корхонаҳои Тоҷикистон дар намоишгоҳи Истанбул

Душанбе, 27.03.2014.(АМИТ «Ховар», Марзия Саидзода).- Се корхонаи ресандагии Тоҷикистон «Спитамен Текстайлз», «Тента-Кӯлоб» ва «Файзи Истиқлол-2011» дар 11-умин Намоишгоҳи байналмилалии нассоҷии Истанбул, ки аз 26 то 29 марти соли равон дар Туркия доир мегардад, кишварамонро намояндагӣ мекунанд. Сафари ҳайати Тоҷикистон ба Туркия бо мусоидати Маркази тиҷорати байналмилалӣ (МТБ) ва бо маблағгузории Ҳукумати Швейтсария дар доираи «Барномаи ҳамкориҳо дар соҳаи тиҷорат» дар Тоҷикистон сурат мегирад. 11-умин намоишгоҳи байналмилалии нассоҷии Истанбул ҳамроҳ бо намоишгоҳи 31-умини таҷҳизоти нассоҷиву дӯзандагӣ ва маҳсулоти кимиёӣ баргузор мегардад. Наргиза Абдумаҷидова аз МТБ дар Тоҷикистон, ки ҳайати кишварамонро дар намоишгоҳ роҳбаладӣ мекунад, гуфт: “Иштироки корхонаҳои Тоҷикистон дар намоишгоҳи Истанбул имкони хубест, то онҳо маҳсулоти худро дар саҳнаи байналмилалӣ, махсусан ба харидорони эҳтимолӣ аз Туркия ва дигар кишварҳо намоиш диҳанд. Корхонаҳои Тоҷикистон аз дастрасӣ ба бозорҳои нав дар Туркия, ки саввумин кишвари истеҳсолкунанда мебошад, манфиати зиёд хоҳанд ёфт”. Ин намоишгоҳ имконияти дарёфти ҳамкорон ва муштариёни нав дар бозори байналмилалиро барои корхонаҳои ресандагии Тоҷикистон бештар мегардонад. Ин намоишгоҳ мизбони беш аз 40 000 боздидкунанда аз тақрибан 70 кишвари ҷаҳон хоҳад буд. Дар он ҳудуди 200 ширкат аз кишварҳои гуногун маҳсулоти худ, ба мисли нахи пахта, таҷҳизоти нассоҷӣ ва дӯзандагӣ, матоъ, маҳсулоти нассоҷӣ, либосворӣ, ришта ва ғайраро ба маърази намоиш хоҳанд гузошт.